सर्बपक्षीय संविधानको माग गर्दै जनजाति आन्दोलित

देब पचभैया

काठमाडौं, २४ पुस

अब बन्ने नया संंविधानमा जातीय, भाषिक, ऐतिहासिक, सांस्कृतिक, लगायतका अधिकारलाई सुनिश्चित गर्न माग गर्दै आदिवासी जनजातिहरु निरन्तर आन्दोलनमा उत्रिएका छन् । चरणबद्ध आन्दोलनमा उत्रिएका आदिवासी जनजातिहरुले सर्बपक्षीय संविधानको माग गर्दै तीनदिने ‘अकुपाई बानेश्वर’ को प्रदर्शन विहिबार सफल रुपमा सम्पन्न गरेका हुन् । ‘अकुपाई बानेश्वर’ को जनमासलाई सम्बोधन गर्दै जनजाति अगुवा मल्ल के सुन्दरले जनजाति अन्दोलन जातीय, भाषिक, सांस्कृतिक, धार्मिक, ऐतिहासिक र भैगोलिक अधिकारका लागि भएको बताए । उनले अल्पसंख्यकहरुले बहुसंख्यक आदिवासी जनजातिमाथी एकल जातीय, एकल भाषिक, एकल धर्म र एकल पहिचानलाई लादिरहेको स्मरण गराउदै अब त्यो संभव नहुने बताए । ‘यो राज्यमा बहुसंख्यक आदिवासी जनजातिको पहिचान सहितको संघीय संविधानको विकल्प छैन ।’ उनले भने । ‘अकुपाई बानेश्वर’ अभियानमा एनेकपा माओवादी नेतृ हिसिला यमी, नेकपा माओवादी बैद्यपक्षका नेता सुरेश आलेमगर लगायतका नेताहरुको उपस्थिती रहेको थियो । अभियानमा नेवा, थरुहट, किरात, मगरात, शेर्पा लगायतका प्रतिनिधिहरुको उपस्थिती रहेको थियो । आदिवासी जनजाति राष्ट्रिय आन्दोलन नेपालले माघ ८ गतेसम्म दोस्रो चरणको आन्दोलन निरन्तर गर्ने यसअघिनै जनाएको छ । यसैबीच नेपाल आदिवासी जनजाति महासंघले पहिचानसहितको संघीय संविधानको माग गर्दै शुक्रबार (भोली) बृहत धर्ना कार्यक्रमको आयोजना गर्दैछ । संविधानसभा भवन अगाडी मध्यान्न १२ बजेबाट हुने बृहत धर्ना कार्यक्रमलाई सफल बनाउन उपस्थितीका लागि सम्पूर्णमा आदिवासी जनजाति महासंघले अनुरोध समेत गरेको छ ।