रूद्र श्रीसमगर
पोखरा, साउन १ – विभिन्न विद्यालयमा अध्ययनरत बालबालिकाहरूलाई नैतिक शिक्षा तथा स्थानीय व्यवहारिक शिक्षा दिने उद्देश्यले युवा बौद्ध संघ, धर्मशीला बुद्ध बिहारले समर क्याम्प सम्पन्न गरेको छ ।
शुक्रबार र शनिबार आयोजित समर क्याम्पमा बालबालिकाहरूलाई पोखरा लेखनाथ महानगरपालिका भित्र रहेका विभिन्न गुम्बा, बिहार तथा चैत्य भ्रमण गराइएको थियो । त्यस अवसरमा धर्मशीला बुद्ध बिहारमा भन्ते धजवन्तले बुद्ध पूजा शील प्रार्थना गरि समर क्याम्पको शुभारम्भ गर्नुभएको थियो ।
बालबालिकाहरूलाई समर क्याम्पको पहिलो दिन अनदूस्थित विश्व शान्ति स्तूपमा राखिएको थियो । दोस्रो दिन भने विश्वरत्न शाक्यले बालबालिकाहरूलाई ध्यान अभ्यास सहित आध्यात्मिक ज्ञान प्रदान गर्नुभएको थियो । सोही दिन बालबालिकाहरू बीचमा चित्रकला प्रतियोगिता गराइएको थियो भने पोखरा अन्तर्राष्ट्रिय पर्वतीय संग्रहालयमा लगी विभिन्न रमाइला खेलहरू खेलाइएको थियो । समर क्याम्पको धर्मशीला बुद्ध बिहारमा बालबालिकाहरूलाई प्रमाणपत्र वितरण गरी समापन गरिएको थियो ।
युवा बौद्ध संघका अध्यक्ष सकेन्द्र ताम्राकारको अध्यक्षतामा भएको कार्यक्रमको सञ्चालन सह–सचिव कमला थापाले गर्नुभएको थियो ।
0
0
