विराटनगर, २९ चैत
नेपाली काँग्रेसकी नेत्री सुजाता कोइरालाले राजनीतिक दल इमान्दारीपूर्वक नलागेमा जेठ १४ गतेभित्र संविधान जारी हुन नसक्ने ठोकुवा गरेकीछन ।
विराटनगर विमानस्थलमा सञ्चारकर्मीसँग संक्षिप्त कुराकानी गर्दै उनले संविधानसभाको म्याद थप्ने वा नथप्नेभन्दा पनि दलहरू गम्भीर भएर समयमै संविधान जारी गर्न लाग्नुपर्ने बताए ।
विगतमा संविधानसभाको म्याद थप्नुबाहेक कुनै खासै काम गर्न नसकेको उल्लेख गर्दै नेत्री कोइरालाले अब म्याद थप्नु भनेको जनतालाई झुक्याउनु हो भनिन । उनले पहिले शान्तिप्रक्रियालाई टुङ्गोमा पुयाएपश्चात् संविधान जारी गर्नुपर्ने उल्लेख गर्दै दलहरू त्यस कार्यमा सक्रिय भएर लाग्नुपर्ने आवश्यकता औँल्याइन ।
एक प्रश्नको जवाफमा उनले अहिले काँग्रेसलाई कमजोर पार्ने खेल सुरु भएको छ भन्दै यस्तो षड्यन्त्र गरेमा मुलुकमा ठूलो दुर्घटना हुने चेतावनीसमेत दिइन । संविधान जारी गर्ने समयमा नेका पार्टीभित्र विवाद आउनु राम्रो होइन भन्दै नेत्री कोइरालाले पार्टीलाई एकढिक्का बनाएर लैजान सभापतिले सबैलाई समेटेर अगाडि बढ्नुपर्ने आवश्यकता औँल्याइन ।
0
0
