विराटनगर, २३ चैत
अर्थमन्त्री भरतमोहन अधिकारीले बजेटलाई न्यायिकरुपमा वितरण गर्न आगामी आर्थिक वर्षका लागि पूर्ण बजेट वैशाख २० गते ल्याउने तयारीमा सरकार जुटेको बताएकाछन ।
उनले आज विराटनगर विमानस्थलमा पत्रकारहरूसँग कुराकानी गर्दै विगतमा असार महिनामा आउने बजेटले विकास निर्माणलगायत देशको आर्थिक विकासमा बाधा हुने गरेकाले वैशाखमा बजेट ल्याउन लागेको स्पष्ट पारे ।
बजेटसम्बन्धी अन्यौलता हटाउन बजेटको संवैधानिक व्यवस्था गर्न आफू लागिपरेको र सरकारसँग समेत माग गरेको बताउँदै अर्थमन्त्री अधिकारीले वैशाखमा बजेट आएमा विगतमा बजेटमा हुने कमीकमजोरी हट्नेछ भने ।
अर्थमन्त्री अधिकारीको शान्तिप्रक्रिया तथा संविधान लेखन सरकारको प्रमुख प्राथमिकता रहेजस्तै देशको विकास र सञ्चालनका लागि बजेट पनि त्यतिकै महत्वपूर्ण भएको तर्क थियो ।
देशको उत्पादन तथा उत्पादकत्व बढाउन न्यायिकरुपमा बजेट वितरण गर्न सरकार लागिपरेको र त्यसलाई प्रभावकारी बनाउन सबैको सहयोग आवश्यक रहेको उल्लेख गर्दै उनले देश विकासको प्रत्येक क्षेत्रमा सरकारी तथा निजी क्षेत्र हातेमालो गरी सँगसँगै बढ्ने विश्वास व्यक्त गरे ।
0
0
