संविधान लेखनका विवादित विषय टुंग्याउन पाँच सदस्यीय उपसमिति गठन

काठमाडौँ, १३ फागुन
संवैधानिक समितिको आज यहाँ बसेको बैठकले संविधान लेखनमा देखिएका विवादित विषयहरूमा सहमति जुटाउनका लागि पाँच सदस्यीय एक उपसमिति गठन गर्ने निर्णय गरेको छ ।

सो उपसमितिमा एकीकृत नेकपा (माओवादी) का अध्यक्ष पुष्पकमल दाहाल ‘प्रचण्ड’, नेपाली काँग्रेस संसदीय दलका नेता रामचन्द्र पौडेल, नेकपा (एमाले) का वरिष्ठ नेता माधवकुमार नेपाल, सभासद् कल्पना राणा तोकिएको छ भने एकजना मधेसीवादी दलहरूबाट राखिने भएको छ । सो समितिले आफ्नो कार्यविधि तय गरी यही फागुन मसान्तभित्र प्रतिवेदन बुझाउने बैठकपछि काँगे्रस नेता पौडेलले पत्रकारहरूलाई जानकारी दिए ।

उनले मधेसवादी दलहरूसँग सल्लाह गरी उपसमितिमा एकजना थपिने सहमति भएको पनि उल्लेख गरे । संविधान निर्माणका क्रममा विभिन्न सात विषयगत समितिहरूमा बाँकी ८३ बँुदामा दलहरूबीच सहमति बन्न सकेको छैन ।