रूद्र श्रीसमगर
पोखरा, असोज २ – आदर्श कला केन्द्र, पोखराले आफ्नो २१ औं वार्षिकोत्सवका अवसरमा शनिबार आयोजना गरेको आदर्श कला केन्द्र विशेष सांगीतिक साँझमा निकै संख्यामा पोखरेलीहरू झुमे । राष्ट्रियस्तरमा चर्चित विभिन्न कलाकारहरूका प्रस्तुती हेर्न आएका पोखरेलीहरू पोखरा सभागृह हलमा खचाखच भरिएका थिए ।
कार्यक्रममा लोकदोहोरी गायक प्रजापति पराजुली, राजु परियार, पुरुषोत्तम न्यौपाने, गायक मनोज राज, कमल किरण, नृत्य निर्देशक सुवास राई, जादुगर बलराम सरकारलगायतले पोखरा सभागृह हललाई संगीतमय बनाए । फरक क्षमता भएका कलाकारहरू चेतप्रसाद अधिकारी र खिमा सापकोटाको नृत्यले दर्शकलाई निकै आकर्षित ग¥यो भने नृत्याड्डना एनी थापामगरको नृत्यले पनि रौनकता थप्यो ।
कार्यक्रमका प्रमुख अतिथि वरिष्ठ संगीतकार प्रकाश गुरुङले आदर्श कला केन्द्रले थुप्रै प्रतिभाशाली कलाकारहरू जन्माउन सफल भएकोमा बधाई दिँदै राष्ट्रका सम्पत्ति कलाकारहरूलाई राज्यले विशेष व्यवस्था गर्नुपर्ने बताउनुभयो । कार्यक्रममा आदर्श कला केन्द्रका भूपू विद्यार्थीहरू एवं सहयोगदाताहरूलाई सम्मान समेत गरिएको थियो ।
आदर्श कला केन्द्रका सञ्चालक गायक एवं संगीतकार जयकुमार परियारको अध्यक्षतामा भएको कार्यक्रमको सञ्चालन सञ्चारकर्मीद्वय मन क्षत्री र लक्ष्मी जिसीले गरेका थिए भने केन्द्रका सल्लाहकार एवं सञ्चार उद्यमी सरस्वती गुरुङले स्वागत गर्नुभएको थियो ।
0
0
