देब पचभैया
पाल्पा, जेठ ६ – पाल्पाको झडेवा–४ दान्सिगा कोइला खन्ने सुरुङ्मा पुरिएर एक मजदुरको सोमबार मृत्यु भएको छ । उदयपुरको आँपटार–१, का ४० वर्षिय कर्णबहादुर राईको सय मिटरको सुरुङ्मा ढिस्को खसेर मृत्यु भएको प्रहरीले जनाएको छ ।
१२ जनाले सँगै काम गर्दै गरेको भएपनि राई भित्र रहेको र माथिबाट खसेको ढिस्कोले पुरेको स्थानीयले बताएका छन् । पाल्पा कोल प्रालिले झडेवाको १, ६, ४, ५ नम्बर वडाबाट कोइला निकालेर बाहिर निकासी गर्दै आएको छ । खानी विभागको स्वीकृतिमा पाल्पा जिल्लाभित्र झडेवा र देवीनगर गाविसका तीस भन्दा बढी स्थानमा कोइला खानीबाट कच्चा पदार्थ निकालिदैं आएको छ ।
यस भेगबाट दैनिक दुई सय बढी ट्रक कोइलाको कच्चा पदार्थ रुपन्देही तथा भारतका विभिन्न स्थानमा निकासी हुँदै आएको स्थानीयले बताएका छन् । देवीनगरमा स्थानीय बासिन्दाले कोइला निकासी गर्न छ महिनादेखि रोक लगाएपनि झडेवाका दर्जनौं स्थानबाट भने कोइला ट्रककाट्रक निकासी हुँदै आएको स्थानीय बासिन्दा गजेन्द्र पन्थीले बताए ।
0
0
