अपहरणकारी मारेर प्रहरीले गर्यो बालकको उद्धार

माघ २३, बिरजंग,विरगञ्जबाट अपहरित एक बालकको उद्धार गर्ने क्रममा भएको दोहोरो भिडन्तमा दुई जनाको मृत्यु भएको छ। भिडन्तका क्रममा प्रहरीले चलाएको गोली लागेर अपहरणकारी रामनाथ गिरीका छोरा संजय गिरी र थर खुल्न नसकेका विन्देश्वर नाम गरेका अर्का एकजनाको मृत्यु भएको पर्सा प्रहरीले जनाएको छ । भिडन्तमा गोली लागेर प्रहरी जवानहरु सुर्य बहादुर थापा र बोदा बहादुर तामाङग घाइते भएका छन् । विरगन्जको आदर्शनगरबाट ९ दिन अघि अपहरणमा परेका बालकलाई प्रहरीले भिडन्तका विचबाट पनि सकुशल मुक्त गराएको छ।

आदर्शनगरका व्यापारी अशोक अग्रावालका ८ वर्षिय छोरा श्लोक अग्रवाल, माघ १३ गते घर नजिकैबाट अपहरणमा परेका थिए। प्रहरी उपरिक्षक पिताम्बर अधिकारीको नेतृत्वमा खटिएको टोलीले भेडियारी गाविस वडा ९ गदियानी टोलका रामनाथ गिरिको घरबाट श्लोकलाइ अपहरणमुक्त गराएको हो ।