कालोपत्रे गरेको महिना नहुदै बाटोको वीच भागमा दुबो उम्रेपछि स्थानीयवासी चिन्तित

गोविन्द घर्ति देवदह

मंसीर ७, बाटो कालोपत्रे गरेको एक महिना नहुदै बाटोको वीच भागमा दुबो उम्रे पछि स्थानीयवासीहरु चिन्तित भएका छन् । रुपन्देहीको देवदह–४ गगन टोलका स्थानीयवासीहरुको आफनै लगानीमा ८ सय मिटर बाटो करिव १३ लाखको लागतमा कालोपत्रे गरेको हो । गत असोज अन्तिम हप्तामा ठेकेदारले उक्त बाटो कालोपत्रे गरेका हुन । बाटो निर्माण समितिको भनाई अनुसार देवदह–३ निवासी टिकाराम भूषाललाई सो बाटो कालोपत्रे गर्न २ वर्ष अगाडि ठेक्का दिईएको थियो । बाटो निर्माण समितिका कोषाध्यक्ष यमुना भट्टराईका अनुसार ठेकेदारले जिरा राम्रो संग नभुटेको र अलकत्र पर्याप्त मात्रामा नहालेका कारण कालोपत्रे बाटोमा दुबो उम्रेको बताउनु हुन्छ । विगत २ वर्ष देखि सो बाटो कालोपत्रे गर्न शुरु गरेता पनि ठेकेदारको लार्वाहीका कारण दूई वर्ष पछि मात्र सम्पन्न भएको र सोही कारण पिचबाटोमा दुबो उम्रेको बताउनु हुन्छ बाटो निर्माण समितिका अध्यक्ष सावित्रा वस्याल । बाटो कालोपत्रे गर्नको लागि स्थानीयवासीहरुले एक फिटको ३ सय पचास रुपैयाको दरले पैसा संकलन गरेर उक्त बाटो पिच गरेको अध्यक्ष वस्यालको भनाई रहेको छ । अध्यक्ष वस्याल भन्नु हुन्छ ठेकेदारले समयमा बाटो कालोपत्रे गरिदिएको भए यो समस्या आउने थिएन । उता ठेकेदार टिकाराम भूषालले भने आफुलाई बाटो कालोपत्रे गर्न कुनै ठेक्का नदिएको तर आफुलाई कालोपत्रे सम्वन्धी ज्ञान भएकाले समितिलाई सहयोग मात्र गरेको बताउनु हुन्छ । बाटो कालोपत्रे गरे वापत बाटो निर्माण समिति संग आफुले आजसम्म एक रुपैया पनि नलिएको ठेकेदार भुषालले बताउनु हुन्छ । ठेकेदार भूषालका अनुसार २ वर्ष पहिला उक्त बाटो कालोपत्रे गर्न भनी गे्रविलिङ गरेको तर बाटो निर्माण समितिले पैसा पुरयाउन नसके पछि काम रोकेको र अहिले आएर बाटो कालोपत्रे गर्दा सो समस्या आएको बताउनु हुन्छ । ठेकेदारका भूषालका अनुसार ग्रेविलिङ गरेको समयमा कालोपत्रे गरेको भए दुबोको समस्या आउने थिएन । देवदह क्षेत्रमा विगत केही समयदेखि बाटो कालोपत्रे गर्ने काम बढेको छ । कुनै बाटो सरकारी लगानीमा कालोपत्रे भएको छ भने कुनै बाटोमा स्थानीवासीले लगानी गरेको छ तर यस विषयमा सम्वन्धीत निकाले कुनै ध्यान दिएको पाईदैन ।