महराको नेतृत्वमा एमाओवादी सरकारमा सहभागी हुने, महरा वरिष्ठ उपप्रधानमन्त्री एवम् सूचना तथा सञ्चार मन्त्री

काठमाडौँ, १९ फागुन

एकीकृत नेकपा (माओवादी) ले स्थायी समिति सदस्य कृष्णबहादुर महराको नेतृत्वमा वर्तमान सरकारमा सहभागी हुने निर्णय गरेको छ । सो पार्टीको केन्द्रीय कार्यालय पेरिसडाँडामा आज बसेको स्थायी समिति बैठकले सो कुराको निक्र्योल गरेको पार्टी प्रवक्ता दीनानाथ शर्माले जानकारी दिए ।

उनका अनुसार नेता महरा वरिष्ठ उपप्रधानमन्त्री एवम् सूचना तथा सञ्चार मन्त्रीका रूपमा सरकारमा सहभागी हुने निश्चित भएको छ । । यसबाहेक एमाओवादीले १० वटा मन्त्रालय लिने बताइएको छ । अन्य मन्त्रालय र मन्त्रीहरुको नाम भने आजै अपराह्न ४ बजे पुनः बस्ने स्थायी समिति बैठकले टुङ्गो लगाउने प्रवक्ता शर्माले बताए ।

पार्टी अध्यक्ष पुष्पकमल दाहाल ‘प्रचण्ड’ गुल्मी महोत्सव उद्घाटनमा जानुपर्ने भएकाले बैठक ४ बजेसम्मका लागि स्थगित गरिएको र उहाँ फर्केपछि पुनः बस्ने बताइएको छ ।