काठमाडौँ, २१ पुस
संविधानसभामा प्रतिनिधित्व गर्ने २८ राजनीतिक दलको आजको बैठकले संविधान लेखनका सन्दर्भमा गठन भएको कार्यदलले सबै विषयगत समितिको प्रतिवेदनमा गरेको प्रगतिलाई अनुमोदन गरेको छ ।
संवैधानिक समितिको प्रतिवेदनमा दलहरुबीच खासै विवाद नभएकाले जुन ढङ्गले कार्यदलमा सहमति भएर प्रतिवेदन आएको थियो, त्यसैअनुसार आजको बैठकले अनुमोदन गरेको जानकारी नेपाली काँग्रेसका नेता रमेश लेखकले दिए ।
न्याय प्रणालीसम्बन्धी प्रतिवेदनमा दलहरुबीच सामान्य मतमतान्तर देखिए पनि कार्यदलका सबै प्रतिवेदनलाई २८ राजनीतिक दलको बैठकले अनुमोदन गरेको नेता लेखकले बताए ।
आजैको बैठकबाट दलहरुबीच विगतमा सहमति हुन नसकेका ८३ वटा विषयलाई सहमतिका लागि नयाँ संविधानको नाम के राख्ने भन्ने विषयबाट प्रारम्भ भएको उनले वताए ।
राष्ट्रिय प्रजातन्त्र पार्टीका नेता लोकेन्द्रबहादुर चन्दले उच्चस्तरीय कार्यदलमा भएको सहमतिलाई टुङ्ग्याउने काम २८ राजनीतिक दलको बैठकले गरेको बताए ।
एनेकपा (माओवादी)का सचेतक पोष्टबहादुर बोगटीले विभिन्न विषयगत समितिका प्रतिवेदनमा सहमति हुन बाँकी ८३ वटा विषयलाई शासकीयस्वरुप समितिको प्रतिवेदनबाट आरम्भ गर्ने जानकारी दिए ।