रौतहट, १९ मङ्सिर
रौतहटको ब्रह्मपुरी गाविसमा साइकल दाइजो मागेको र दुई वर्ष बितिसक्दा पनि नल्याएको भन्दै श्रीमान् र सासूससुरा मिलेर एक युवतीको घरमा नै हत्या गरेको घटना सार्वजनिक भएको छ ।
शुक्रवार राति श्रीमान् महेन्द्र दास, ससुरा मञ्चित दास र सासू शिवकुमारी दास मिलेर १८ वर्षीया ममतादेवी दासलाई धारिलो हतियारले घाँटी रेटेर हत्या गरेका थिए । उनीहरु सबै अहिले फरार छन् ।
भारतको सीतामढी जिल्ला हरिपुर ग्राम माइती भएकी ममतालाई साइकल नल्याएको भन्दै पटकपटक यातना दिने गरेको मृतकका बाबु जिवछ दासले बताए ।
मृतक युवतीका बाबु जिवछले भने– “छोरीलाई साइकल ल्याउन दबाब दिँदै आएका थिए, बिहेमा ८० हजार नगद र अन्य सामान गरी रु एक लाख ५० हजारभन्दा बढीको दाइजो दिएको थिएँ ।”
मङ्सिर ४ गते पनि रौतहटको औरया गाविस–५ की २१ वर्षीया रुपकान्तदेवी मण्डललाई हत्या गरेर श्रीमान्सहित परिवारका सबैजना फरार भएका थिए ।
कात्तिक १७ गते हजमुनिया गाविस–५ की २० वर्षीया बबितादेवी महतोलाई श्रीमान्सहित घरका अन्य सदस्य मिलेर घाँटी थिचेर हत्या गरेका थिए ।
जिल्ला प्रहरी कार्यालय रौतहटका प्रहरी निरीक्षक मधुकुमार थापाले सबै आरोपीहरुको खोजी भइरहेको जानकारी दिनुभएको छ । रासस
0
0
