चितवन (रत्ननगर), ११ मङ्सिर
चितवनमा प्रहरी र प्रदर्शनकारीबीच झडप भएको छ ।
झडपमा परी एक दर्जन प्रदर्शनकारी घाइते भएका छन् । घाइतेहरूको अहिले भरतपुरका विभिन्न अस्पतालमा उपचार भइरहेको छ ।
प्रहरी हिरासतमा रहस्यमय रुपमा मृत्यु भएका पूर्वी चितवन जयमङ्गलाका सोमबहादुर दराईको मृत्युको विषयमा स्थानीयवासीले अहिले चितवन रत्ननगरको वकुलहरमा सडक अवरुद्ध पारेपछि सडक खुलाउने क्रममा आज दिउँसो प्रहरी र प्रदर्शनकारीबीच झडप भएको हो ।
झडपमा परी घाइते हुनेमा मृतक दराइकी श्रमिती गङ्गा दराई, बुबा मगरा दराई, छोरी सुनिता, गीता , वुनु दराई, सूर्य वराल, सूर्यनाथ ढुङ्गाना, प्रेम थापा र प्रेम विक, रोशन लामालगायत घाइते भएको सङ्घर्ष समितिले जनएको छ ।
घाइतेमध्ये एकजनाको अवस्था गम्भीर रहेको बताइएको छ । यता प्रहरीले भने चारजना सामान्य घाइते भएको जनाएको छ ।
मध्याह्न १२ बजेदेखि १ बजेसम्म चक्काजाम गर्ने पूर्व निर्धारित कार्यक्रममा प्रहरीले हस्तक्षेप गरेको भन्दै उनीहरूले अहिले सडक बन्द गरेर प्रदर्शन गरिरहेका छन् ।
दराईको मृत्यु नभई हत्या गरिएको आरोपमा उनीहरूले दोषीमाथि कडा कारबाही र मृतक परिवारलाई क्षतिपूर्ति उपलब्ध गराउनुपर्ने माग गरेर सडक बन्द गरेका हुन् ।
सोमबहादुर दराई घटना पीडित सङ्घर्ष समितिको अगुवाइमा भएको बन्दका कारण अहिले हेटौंडा–नारायणगढ सडकखण्ड ठप्प भएको छ ।
दराईको गत असोज छ गते इलाका प्रहरी कार्यालय वकुलहरमा मृत्यु भएको थियो । सो घटनाको विरोधमा स्थानियवासीले विभिन्न विरोधका कार्यक्रम गर्दै आएका छन् । रासस
0
0
