राजविराज ७ मङ्सिर
सप्तरी प्रहरीले मङ्गलबार राजविराजमा बालक अपहरण गर्ने एक गिरोहलाई पक्राउ गरी सार्वजनिक गरेको छ ।
प्रहरीको गोप्य सूचना र सुराकीका आधारमा पक्राउ परेका चारजनालाई मङ्गलबार पत्रकार सम्मेलन गरी सार्वजनिक गरिएको हो ।
पक्राउ पर्नेमा सप्तरीको अर्नाहा–१ का जयप्रकाश चौधरी र महिनारायण चौधरी तथा बनौली–७ का सुरेशकुमार चौधरी र लल्कु चौधरी रहेका छन् ।
पक्राउ परेका उनीहरुको साथबाट प्रहरीले एकथान ल्यापटपसमेत बरामद गरेको छ । बरामद गरिएको ल्यापटप सभासद् रमणी रामको घरबाट केही महिनाअघि लुटिएको जानकारी प्रहरीले दिएको छ ।
उनीहरुमाथि अपहरण तथा शरीर बन्धक मुद्दामा अनुसन्धान थालिएको प्रहरी निरीक्षक भुवनेश्वरप्रसाद साहले जानकारी दिएकाछन् ।
दुई दिन अघिमात्र सभासद् रमणी रामका पति भोला रामलाई अपहरण गरी लुटपाट गर्ने गिरोहको मुख्य नाइके मैनाकडेरी–५ का काशिन्द्र यादवलाई लुटिएको कम्प्युटरसहित प्रहरीले पक्राउ गरेको थियो ।
सप्तरी जिल्ला अदालतले यादवलाई सोमबार पुर्पक्षका लागि कारागार पठाएको छ ।
उनीहरुको समूहले नाबालकलाई ललाइफकाइ बोलाएर अपहरण गरी भारत पु¥याउने गरेको सप्तरीका प्रहरी निरीक्षक साहले बताए ।
अपहरणकारी समूह पक्राउ परेपछि प्रहरीले अपहरित बालक जनककिशोर चौधरीको समेत उद्धार गरेको छ ।
राजविराज–६ स्थित देवकी बाल विद्या मन्दिरमा कक्षा ५ मा अध्ययनरत १२ वर्षीय बालक जनककिशोरलाई भारतको लौकही जिरो माइल नजिकबाट सकुशल मुक्त गराउन सफल भएको प्रहरीको भनाइ छ ।
रासस
0
0
