काठमाडौँ, २७ कात्तिक । प्रधानमन्त्री माधवकुमार नेपालले राष्ट्रिय योजना आयोगका उपाध्यक्ष र अर्थसचिवसँग आज बजेट ल्याउने बारेमा छलफल गरेका छन् ।
प्रधानमन्त्री निवास बालुवाटारमा आज भएको छलफलमा बजेटको आकारप्रकार, योजना, कार्यक्रमलाई कसरी प्रभावकारी बनाउन लागिएको छ र बजेटको तयारी कस्तो भइरहेको छ भन्ने विषयमा उपाध्यक्ष डा जगदीशचन्द्र पोखरेल र अर्थसचिव रामेश्वर खनालसँग छलफल भएको जानकारी प्रधानमन्त्रीका पे्रस सल्लाहकार विष्णु रिजालले दिए ।
उनका अनुसार दलहरूसँग भइरहेको सत्तासाझेदारी, राजनीतिक गतिरोधको अन्त्य, बजेट, सेना समायोजन लगायतका विषयमा एकमुष्ट सहमति हुने सम्भावना तत्कालका लागि न्यून भएकाले मङ्सिर ३ गतेभित्र बजेट ल्याउने प्रधानमन्त्रीको प्रतिबद्धताअनुसार सो छलफल भएको हो ।
यसअघि प्रधानमन्त्री नेपालले अर्थमन्त्री सुरेन्द्र पाण्डेलाई मङ्सिर ३ गते बजेट ल्याउनेगरी तयारी गर्न निर्देशन दिइसकेका छन ।
त्यस्तै प्रधानमन्त्री नेपालले हिजोमात्र पूर्व अर्थसचिव तथा कानुन व्यवसायीसँग बजेट ल्याउँदाका चुनौती र कानुनी अड्चनका बारेमा छलफल गरिसकेका छन । छलफलमा सहभागी पूर्व अर्थसचिव तथा कानुन व्यवसायीले बजेट ल्याउन कुनै कानुनी अड्चन नभएको सुझाव प्रधानमन्त्रीलाई दिएका थिए ।
सरकारले प्रस्तुत गरेको एक तृतीयांश बजेट यही कात्तिक मसान्तभित्र सकिने भएकाले मुलुकलाई आर्थिक सङ्कटबाट मुक्त गराउन मङ्सिर ३ गते बजेट ल्याउनुपर्नेमा प्रधानमन्त्री नेपालले जोड दिँदै आएका छन् ।
प्रधानमन्त्री नेपालले बेजेटकै बारेमा आजै सत्ता साझेदार दल र मन्त्रिपरिषद्को बैठक वोलाएका छन् ।
रासस
0
0
