मनोज घर्तीमगर
पोखरा, नारीप्रधान मगर कथानक नेपाली फिल्म ‘रैंयाँ’ पोखरामा पहिलो पटक प्रर्दशन भएको छ ।
भैंचालो पीडितको सहयोगार्थ पोखरा सभागृहमा शनिबार रैंयाँ प्रर्दशन भएको हो । पर्यटकीय नगरी पोखरा, म्याग्दी, तनहुँ, स्याङ्जा लगायतका क्षेत्रमा छायांकन गरिएको फिल्मले मगर महिलाको परम्परागत गहनालाई ‘रैंया’ लाई जीवन्तता दिने प्रयास गरिएको छ । दुवै हातमा लगाउँने काँडे बाला (रैंया) हातको शोभा बढाउने मात्रै होइन, आपतविपतमा हतियारको समेत काम गर्ने विषयलाई रोचक तरिकाले फिल्ममा उतारिएको निर्देशक मेजन पुनमगरले बताए ।
मगर समुदायमा छोरीलाई आठदेखि दस बर्षभित्र आमाले गुन्यूचोली, रैया (बाला) र घलेक दिनैपर्ने सँस्कार छ । यही विषयलाई केन्द्रमा पारी बनाइएको फिल्ममा दुई नयाँ अनुहारका अशोक मगर प्रिया मगर मुख्य भूमिकामा देखिएका छन् । मगर फिल्मको पहिलो नायक राज थापाको समेत अभिनय रहेको फिल्ममा हर्क आलेको कथा छ । हर्क मगरको कथा रहेको फिल्मको निर्माता तारामाया मगर र हर्क मगर हुन भने डकुमेन्ट्री मेकर भिमबहादुर रानाको सहनिर्देशन छ ।
पोखरामा शो गरिएको फिल्म तनहुँ दमौलीमा जेठ ९ गते, साँघुमा १५ गते, थर्पुमा १६ गते र तनहुँकै खैरेनीटारमा २३ गते प्रदर्शन गरिने निर्माता तारामाया थापा मगरले जानकारी दिइन् ।
0
0
