कार र ट्रक ठोकिदा तीन जनाको ज्यान गयो

पर्सा ४ माघ

बाराको अमलेखगञ्जमा गएराति भएको सवारी दुर्घटनामा मर्नेको सङ्ख्या तीन पुगेको छ । उक्त दुर्घटनामा गम्भीर घाइते भएका वीरगन्जका १३ वर्षीय बालक उमङ्ग गौतमको आज बिहान उपचारका क्रममा ज्यान गएपछि मर्नेको सङ्ख्या तीन पुगेको हो ।

यसअघि वीरगन्जका वीरगन्ज जेसिसका पूर्वअध्यक्ष दिनेश आचार्य र १४ वर्षीय बालिका इंकिता मानन्धरको गएराति घटनास्थलमा नै मृत्यु भएको थियो । हेटौँडाबाट वीरगन्ज आउँदै गरेको बा४च २९७४ नंको कार र पथलैयाबाट हेटौँडातर्फ जाँदै गरेको ना४ख २०१० नंको ट्रक एकआपसमा ठोक्किँदा उक्त दुर्घटना भएको हो । दुर्घटनामा परी गम्भीर घाइते भएका वीरगन्जकै सर्वेश आचार्य र कृष्ण मानन्धरको काठमाडौँमा उपचार भइरहेको नारायणी अञ्चल अस्पतालले जनाएको छ ।