मलेसियामा एक नेपाली युवकको मृत्यु

उदयपुर (बोक्से), ११ पुस

मलेसियामा कामदारका रुपमा काम गर्दै आएका उदयपुरका एक युवकको शनिबार बङ्गुरको आक्रमणबाट मृत्यु भएको छ ।

पोथीसँग सहबास गराउने क्रममा भाले बङ्गुरको आक्रमणबाट घाइते भएका जाँते गाविस–५ चौलाने घरभई मलेसियाको पेनाङस्थित बङ्गुर फारममा काम गर्दै आएका टिकाशेर राईको मृत्यु भएको आफन्तले जनाएका छन् ।

आक्रमणबाट गम्भीर घाइते भएका ३४ वर्षीय राईको मलेसियाको सरकारी अस्पतालमा उपचारका लागि लैजाने क्रममा मृत्यु भएको आफन्त मिलन राईले बताए ।

घाइते राईको करङ भाँचिएको र खुट्टामा समेत गम्भीर चोट लागेपछि अत्याधिक रक्तश्राव भई मृत्यु भएको जनाइएको छ ।
विगत सात वर्षदेखि वैदेशिक रोजगारीका क्रममा मलेसियामा रहेका राई पछिल्लो समयमा भिसाको म्याद गुजारेर बस्दै आएकाले उनको शव स्वदेश ल्याउन समस्या भएको बताइएको छ ।