लमजुङ, १० कात्तिक
नेकपा एमालेका पोलिटब्युरो सदस्य एवम् सभासद् पृथ्वीसुब्बा गुरुङले काँग्रेस र माओवादीका कारण वर्तमान राजनीतिक गतिरोध लम्बिएको बताएकाछन् ।
विजयादशमी तथा दिपावलीको अवसरमा आज नेकपा एमाले जिल्ला कमिटी लमजुङले गरेको चियापान तथा शुभकामना आदानप्रदान कार्यक्रममा बोल्दै गुरुङले काँग्रेसले माओवादीलाई एक्ल्याएर अगाडि बढ्न चाहेको र माओवादीले ढोङ्गी कुरा गरी छलकपटको राजनीति गरेकाले अहिलेको गतिरोध लम्बिएको आरोप लगाए ।
उनले एमालेले गणतन्त्रवादीको मोर्चा बनाएर बढ्न चाहेको र सोही मोर्चाबाटै संविधान बनाउने प्रयासमा रहेको बताए ।
पूर्वमन्त्रीसमेत रहेका गुरुङले प्रधानमन्त्रीको चुनावमा काँग्रेसले मेरो गोरुको बाह्रै टक्का भन्ने हठ त्यागे समस्याको समाधान हुने बताए ।
उनले माओवादीले हतियार नत्याग्दा र सेना समायोजन नहुँदासम्म उसको नेतृत्वमा सरकार बन्न नसक्ने एमालेको प्रष्ट विचार हुँदाहुँदै पनि एमाले र माओवादीको पछिल्लो सहमतिमा काँग्रेस तर्सनुपर्ने कुनै आधार नभएको बताए ।
उनले एमाले र माओवादीको पछिल्लो सहमतिमा माओवादी नेतृत्वमा सरकार बनाउने बुँदा नरहेको पनि बताए । रासस
0
0
