जनकपुरधाम, ५ कात्तिक
अपहरणपछि कर्तव्य गरी ज्यान मार्ने, अपहरण तथा शरीर बन्धक बनाउने र हातहतियार खरखजाना घटनामा संलग्न पाँचजनालाई प्रहरीले पक्राउ गरेको छ ।
जिल्ला प्रहरी कार्यालय धनुषाका अनुसार दुहवी गाविस–८ का लक्ष्मेश्वर यादवका छोरा वर्ष पाँचका दीपेशकुमार यादवलाई अपहरणपछि कर्तव्य गरी हत्या गर्ने घटनामा संलग्न रामदेव मुखिया र रामबाबु यादव पक्राउ परेका हुन् ।
आसमा नामक संस्थामा जागिर नदिएका कारणले सोही रिसइबीले लक्ष्मेश्वर यादवका छोरोको हत्या गरिएको बुझिएको छ ।
त्यस्तै, दुवरकोट हथलेट्का वडा नं २ का वर्ष ५१ का श्यामसुन्दर मण्डललाई सुतेको अवस्थामा अपहरण गरी भारतको अज्ञात ठाउँमा लुकाई राख्ने घटनामा संलग्न बल्दा सघाराका लुबरा कवाडी भन्ने नइम कवाडीलाई पनि पक्राउ गरिएको छ ।
यसैगरी लेनदेनका कारण मखनाहा गाविस–३ का जीतनारायण मण्डलका छोरा ६ वर्षीय अर्जुनकुमार मण्डललाई अपहरण गर्ने कार्यमा संलग्न धनीलाल महतो पनि पक्राउ परेका छन् ।
त्यस्तै कजरा रमौल गाविस–९ इनर्वा गाउँमा कटुवा पेस्तोल बोकी हिँडिरहेको अवस्थामा गोविन्दपुर–१ का राजकुमार महरालाई समेत पक्राउ गरिएको छ ।
पाँचैजनालाई आज जिल्ला प्रहरी कार्यालयमा पत्रकार सम्मेलन गरी सार्वजनिक गरिएको हो । रासस
0
0
