यूकेमा घलेहरुको वार्षिक भेटघाट सम्पन्न

घलेहरुलाई पनि आदिवासी जनजातिमा सुचिक्रित गरिनु पर्ने

धन घले

अल्डरसट,
बेलायतभरिका आम घले समुदायको वृहत भेला २६ सेप्टेम्बर २०१५ का दिन भेटघाट रेस्टुरेन्ट अल्डरसटमा भव्यताकासाथ सम्पन्न भएको छ । सो भेलामा बेलायतभरि छरिएर रहेका डाँङ्गे, साप्री, घेल्ताङ र रेलाङ चारै थरका घलेहरुको ठूलो संख्यामा सहभागिता रहेको थियो । कार्यक्रमको सुरुमा संस्थाका अध्यक्ष टीकाराम घलेले उपस्थित सबैलाई धन्यवाद र न्यानो अभिवादनका साथ स्वागत भाषण गरेका थिए ।

कार्यक्रममा संस्थाका पूर्व सचिव तथा जनजाति महासंघ बेलायतका पूर्व महासचिव धन घलेले घले जातको पहिचान बारे प्रकाश परेका थिए । उनले अभिवादन ‘स्युब ख्यङ्ग’ (नमस्ते) भन्ने शव्दलाई प्रस्तुत गर्दै घले जाति विश्वमा विश्व विजेताको नामले चिनिएको जानकारी दिए । ऐतिहासिक युद्धस्थल नालापानी किल्लाका निर्माता कप्तान अंगद घले, दोस्रो विश्वयुद्धको विजेता वीरहरुको पनि वीर भीसी गजे घले, एनआरएनका वर्तमान अध्यक्ष शेष घले आदि घलेहरु प्रख्यात रहेको पनि उल्लेख गरे ।

यसरी संसारभर प्रख्यात रहेका घले (लिःल) जातिहरु आफ्नै देशमा भने आजसम्म कानूनीरुपले चिनिन सकिरहेका छैनन् भन्दै उनले हामी घले जातिहरु आफ्नै देशमा पहिचान विहिन भएर बाँच्नु परेको अवस्था गुनासो पोखे ।

घले जातिको अर्थ एवं परिभाषा दिँदै धन घलेले भने –‘घले जातिलाई घले भाषा (लिल कैंइ)मा विशिष्ट र मौलिक अर्थ लगाएको पाइन्छ ।‘लिः’ को अर्थ नेपाली भाषामा शक्तिशाली हुन्छ भने ‘ल’को अर्थ आत्मा हुन्छ । यसरी यी शव्दहरु संयोजन गरी अर्थ लगाउँदा शक्तिशाली आत्मावाट उत्पत्ति भएको वा जन्मिएको जाति घले हो भनी परापूर्वकालदेखि नै मानिँदै आइएको छ । घले जातिलाई लिःल नै भनेर आजभन्दा ६ सय वर्षभन्दा पहिला अर्थात ई सं १४१४ को शासनकालको बेलासम्मको पहिचान थियो । त्यसबेलाको स्थापित घले जातिको लिःल थियो र हाम्रो पुरानो कागजपत्रहरुमा पनि सोही कायम छ । घले जातिलाई लिःल शव्द प्रचलनमा रहँदा रहँदै पनि त्यस समयका शासकहरुले लिःल भन्न अप्ठेरो मानी सजिलोको निम्ति नेपालीमा अनुवाद गर्दा घले हुन आएको हो । यसरी घले जातिको परम्परागत मूल्य मान्यता र संस्कारहरुमा पनि घलेभन्दा बढी लिःल शव्द नै बढी मौलिक प्रचलनमा आउँछ ।’

उनले थपे हालसालै नयाँ संविधानको अध्याय २७ र धारा २६१ मा लेखिएको आदिवासी जनजाति आयोग गठनमा घलेहरुलाई पनि संलग्न गराउनु पर्ने अन्यथा आन्दोलन गरिने बताए । आफुले विभिन्न पन्ध्र देशमा रहेका संघर्ष समितिहरुको संयोजन गर्दै नेपालमा घले समाजको कार्यालय खोलिसेकेको जानकारी दिए । उनले अनुशूचीमा घले जातिलाई पार्नको लागि सबैसँग सहयोगको आव्हान गरे ।

कार्यक्रममा संस्थाका उपाध्यक्ष राजु घले, कोषाध्यक्ष लाल घले, कोअर्डिनेटर दिल घले तथा बारपाकी समाजका अध्यक्ष मिन घले, उपाध्यक्ष सुर घले, सचिव जित घले र पूर्वअध्यक्ष डम्बर घले लगायतका घलेहरुको उपस्थिति रहेको थियो ।
उक्त कार्यक्रममा विभिन्न विषयमा दक्षता हासिल गरेका व्यक्तित्वोहरु डा. गौरव घले, बारपाकी समाजका सचिव जित घलेलगायत लगायतलाई खादा ओडाई सम्मान गरिएको थियो ।

सचिव मानध्वज घलेद्वारा संचालित सो कार्यक्रमको अन्तमा उनकै म्युजिकमा नाचगान गरी सहभागीहरुले भरपुर मनोरञ्जन लिएका थिए ।