रूद्र श्रीसमगर
पोखरा, १९ साउन
पूराना निर्देशक किशोर रानाको निर्देशनमा बनेको पछिल्लो फिल्म ‘प्रतिविम्ब’ यही साउन २१ गतेदेखि देशव्यापी प्रदर्शनमा आउने भएको छ ।
मगर संस्कृतिमा आधारित बहुप्रतीक्षित नेपाली कथानक चलचित्र ‘प्रतिविम्ब’लाई च्यारिटी शोमार्फत् यसअघि नै दर्शकले रुचाएका थिए । चलचित्रमा सञ्चारकर्मी तथा गायक मनसुधन थापा, नायिका पवित्रा सारू ‘डिम्पल’, गायक कुमार राना, मिस मगर हङकङ कमला पुनलगायतका कलाकारहरूको अभिनय छ ।
द लाफा आर्टस् इन्टरनेशनलको ब्यानरमा निर्मित फिल्ममा किशोर रानाको लेखन र निर्देशन रहेको छ । राजकुमार ‘बगर’को शब्द, संगीत र कथा रहेको फिल्मको कोरियोग्राफी कमल राईले गरेका छन् । शंकर महर्जनको द्वन्द्व रहेको फिल्म यम आलेमगरले खिचेका हुन् ।
ज्ञानु थापामगर, के.बी राना, नेत्र थापा, चन्द्र ज्योति आलेमगर, अनिता रानामगर, छक्कु उदासी र गोमा पुनलगायतको २५ लाख रुपैयाँ लगानीमा बनेको सो चलचित्रमा लाहुरे संस्कृतिले पारेको प्रभावलाई देखाउन खोजिएको छ । च्यारिटी शोमार्फत् हेरेका दर्शकले चलचित्र मन पराइदिएको र अब पनि चलचित्रलाई दर्शकले मन पराउने विश्वास लिएको निर्माताहरूमध्येकी एक चन्द्र ज्योति आलेमगरले बताइन ।