नेपाल मगर संघ, साउदी अरबको आयोजनामा आगामी २६ फेब्रुअरीका दिन साउदीको दमाम शहरको खयाम पार्टी प्यालेसमा “३४ औं मगर दिवस” आयोजना हुने भएको छ। साउदी अरबको पूर्वी प्रान्त दमाम, खोबर र जुबेलमा कार्यरत नेपालीहरूलाई समेट्ने गरि त्यस क्षेत्रको केन्द्रबिन्दु पारेर दमाममा कार्यक्रमको आयोजना गरिने भएको हो ।
३४ औं मगर दिवस समारोहमा नेपालबाट चर्चित लोक दोहोरी गायिका निता पुन मगरलाई निम्त्याइएको छ । गायिका निता पुनमगर र साउदी मै रोजगारीको शिलशिलामा रहनु हुने प्रतिभाशाली लोक तथा आधुनिक गायक तिलक गुरुङको बेजोड प्रस्तुति रहने आयोजक समितिले बताएका छन् । साथमा स्थानीय कलाकारहरूको पनि केहि प्रस्तुति समावेश गरिने छ ।
नेपाल मगर संघ, साउदी अरबद्वारा आयोजित ३४ औं मगर दिवसलाई जेट एअरवेज, आइएमई र अल जजिरा बैंक (एकसाथ), अरब नेशनल बैंक र सिटी एक्सप्रेस (एक साथ) साथै पूर्व एनआरएन आइसीसी सदस्य तथा समाजसेवी श्री राजु सैयदले प्रायोजन गर्ने भएको छ । थप केहि व्यवासायिक कम्पनीहरूले पनि कार्यक्रमको प्रायोजन गर्न सक्ने सम्भावना रहेको छ ।
साउदीमा रहेका मगर तथा गैरमगरहरूलाई ३४ औं मगर दिवस अथवा मगर एकता दिवसको बारेमा जानकारी गराउँने, मगरहरू एकता हुनु परेको कारण र मगरहरूको भाषा, संस्कृति र धर्मलाई संरक्षण, विकास र संवर्द्धन गर्न कै खातिर पहिचान सहितको मगरात प्रदेशको प्रत्याभूत हुनुपर्ने र त्यसले मात्रै नेपालमा स्थायी शान्ति, समृद्धि र सुशासन हुने जस्ता राष्ट्रिय स्वाधिनताका कुराहरू आम प्रवासी नेपाली दाजुभाई तथा दिदीबहिनीहरूलाई अवगत गराउँने कार्यक्रमको मूल उद्देश्य रहेको छ । कार्यक्रममा सहभागी हुन चाहनु हुने महानुभावहरूलाई निशुल्क प्रवेशको व्यवस्था गरिएको छ ।
३४ औं मगर दिवसलाई नेपाली दूताबासको अनुरोधमा साउदी सुरक्षा विभागको प्रत्यक्ष सहयोग हुने भएकोले कार्यक्रम स्थलमा अनैतिक गतिविधिहरू नगर्न र नगराउँन आयोजक समितिले अनुरोधका साथ जानकारी गराइएको छ । विगतमा पनि नेपाल मगर संघ, साउदीले यस्तै खालका कार्यक्रमको आयोजना गर्दै आइरहेको छ ।
रूद्र सारू मगर, नेपाल मगर संघ साउदीका अध्यक्ष हुन ।
0
0
