मोरङ ९ चैत
मोरङको शनिश्चरे– १ स्थित भुटानी शरणार्थी शिविरमा मङ्गलबार आगलागी हुँदा रु ९२ लाख बराबरको क्षति भएको जिल्ला दैवीप्रकोप नियन्त्रण समितिले जनाएको छ ।
समितिका संयोजक मोरङका प्रमुख जिल्ला अधिकारी सुरेश अधिकारीका अनुसार आगलागीमा परेर १०२ घर जलेर नष्ट भएका छन् भने २० वटा घर आगो नियन्त्रण गर्ने क्रममा भत्किएका छन् ।
आगलागीमा परी करिब एक हजार शरणार्थी विस्थापित भएको र उनीहरू आफन्त र शिविरभित्रको स्कुलमा शरण लिएर बसिरहेका छन् ।
आगलागीमा परी शरणार्थी परिवारका कपडा, भाँडादेखि, प्रमाणपत्र र अन्य धनमालसमेत जलेर नष्ट भएको छ ।
विस्थापित शरणार्थीलाई राहत वितरण गर्न संयुक्त राष्ट्र सङ्घको शरणार्थी एकाइ र स्थानीय सामाजिक सङ्घसंस्था लाग्ने आफूले जानकारी पाएको प्रजिअ अधिकारीले बताउनुभयो । उहाँले आफूहरूसँग शरणार्थीलाई राहत बाँड्ने बजेट पनि नभएकाले शरणार्थीका लागि खटिएका सङ्घसंस्थालाई नै आग्रह गरिने बताए ।
शिविरको सेक्टर बी टु छाप्रा नम्बर ६४ का भक्तबहादुर दर्जीको घरबाट सुरु भएको आगलागी समयमा नियन्त्रण लिन नसक्दा ठूलो मात्रामा आगोले क्षति पु¥याएको हो । आगलागीबाट क्याम्पस व्यवस्थापन समितिको कार्यालयसमेत जलेर नष्ट भएको छ ।
आगलागीको वास्तविक कारण अझैसम्म खुल्न नसकेकाले अनुसन्धान भइरहेको प्रहरीले जनाएको छ ।
0
0
