जनकपुरधाम, २१ फागुन
मधेसी जनअधिकार फोरम नेपालका अध्यक्ष उपेन्द्र यादवले शान्ति, संविधान लेखन र मधेसका मुद्दाका सन्दर्भमा समयतालिकासँगै विश्वसनीय आधार नभएसम्म आफूहरू सरकारमा नजाने बताएका छन ।
सो पार्टीको धनुषा जिल्ला कार्यसमितिद्वारा आज आयोजित पत्रकार सम्मेलनमा उहाँले मधेसका मुद्दालाई गौण बनाई आफूहरू सरकारमा साझेदारी नगर्ने स्पष्ट गरे । एकीकृत नेकपा (माओवादी) र नेकपा (एमाले) का गतिविधिले आशङ्का सिर्जना भएको छ भन्दै उनले दुवै पार्टीले मुलुकमा उब्जिएका आशङ्कालाई अन्त गर्ने वातावरण सिर्जना गर्नु आवश्यक छ भने ।
अध्यक्ष यादवले राजनीतिक दलहरूको आन्तरिक कलह, दलहरूबीच विश्वासको अभाव र विभिन्न अन्तर्राष्ट्रिय खेलले शान्ति, संविधान निर्माणमाथि चुनौती खडा भएको पनि बताए । व्यवहारमा अहिलेका माओवादी लडाकू माओवादीकै नियन्त्रणमा रहनुले द्वन्द्व व्यवस्थापनमा समस्या देखिएको छ भन्दै उनले सत्ता र शक्तिका लागि दलहरूको ध्यान केन्द्रित रहने प्रवृत्तिले पनि सङ्कटपूर्ण अवस्था कायम छ भने ।
एक प्रश्नको जवाफमा उनले संयुक्त लोकतान्त्रिक मधेसी मोर्चाको जनविद्रोह गर्ने घोषणा कार्यकर्तालाई भ्रमित पार्ने खेल हो भने ।
0
0
