काठमाडौँ, १३ फागुन
एकीकृत नेकपा (माओवादी) र नेकपा (एमाले) का शीर्ष नेताहरुबीच मन्त्रिपरिषद् विस्तार गर्ने सम्बन्धमा बसेको बैठक विनानिष्कर्ष टुङ्गिएको छ ।
सातबुँदे सहमतिको मर्म विपरित गृह मन्त्रालयको जिम्मेवारी प्रधानमन्त्री स्वयम्ले राखेर हाललाई मन्त्रिपरिषद् गठन गर्ने एमाले अध्यक्ष एवम् प्रधानमन्त्री झलनाथ खनालको प्रस्तावप्रति आफूहरु असहमत रहेको माओवादीका उपाध्यक्ष नारायणकाजी श्रेष्ठले बताए ।
“सातबुँदे सहमति संशोधन पनि गर्ने र गृह मन्त्रालय पनि आफैँ राख्ने नेकपा (एमाले) का निर्णय मान्न हामी बाध्य छैनौँ”, बैठकपछि उपाध्यक्ष श्रेष्ठले भने ।
खनाल नेतृत्वको सरकारमा सामेल हुने वा नहुने भन्नेबारेमा पार्टीको आजै बस्ने स्थायी समिति बैठकले निर्णय गर्ने जानकारी उनले दिए । बैठकमा एमाले अध्यक्ष एवम् प्रधानमन्त्री खनाल, वरिष्ठ नेता माधवकुमार नेपाल र ईश्वर पोखरेल थिए । त्यसैगरी, माओवादीका तर्फबाट अध्यक्ष पुष्पकमल दाहाल, उपाध्यक्षद्वय मोहन वैद्य र श्रेष्ठ सहभागि थिए ।
0
0
