काठमाडौँ, ५ माघ
शिविरमा रहेका लडाकू र हतियारलाई औपचारिकरुपमा यही माघ ८ गतेदेखि सेना समायोजन विशेष समितिअन्तर्गत ल्याइने भएको छ । चितवनस्थित शक्तिखोर शिविरमा विशेष कार्यक्रम आयोजना गरी शिविरमा रहेका लडाकू र हातहतियार समितिअन्तर्गत ल्याइएको घोषणा गरिने समितिको आज बिहान प्रधानमन्त्री कार्यालय सिंहदरबारमा बसेको बैठकले निर्णय गरेको हो ।
गृहमन्त्री भीम रावलको अध्यक्षतामा तीन सदस्यीय कार्यक्रम व्यवस्थापकीय समिति गठन गरिएको बैठकपछि समितिका सदस्य जयप्रकास प्रसाद गुप्ताले जानकारी दिए । लडाकू र हातहतियारलाई सेना समायोजन विशेष समितिको मातहतमा सञ्चालन गर्ने सहमति सरकार र एकीकृत नेकपा (माओवादी) बीच भइसकेको छ ।
साथै, बैठकले सरकार र एकीकृत नेकपा (माओवादी) बीचमा गत पुस ३० गते भएको तीनबुँदे सहमतिलाई अनुमोदन गरिनुका साथै सहमतिअनुरुप लडाकू र हातहतियार व्यवस्थापनसम्बन्धी अनुगमनका लागि ६ सदस्यीय संयन्त्र बनाउने सहमति पनि भएको छ । बैठक प्रधानमन्त्री माधवकुमार नेपालको अध्यक्षतामा बसेको थियो ।
0
0
