काठमाडौँ, २ पुस
संसद्अन्तर्गतको सार्वजानिक लेखा समितिले नेपाल वायुसेवा निगमले विमान खरिदका लागि पठाएको बैना रकम र अनियमितताको विषयमा भइरहेको छानविनलाई छिटो निष्कर्षमा पु¥याउन अख्तियार दुरुपयोग अनुसन्धान आयोगलाई निर्देशन दिएको छ ।
सिंहदरबारमा आज बसेको समितिको बैठकले छानविन प्रक्रिया लम्बिँदा खरिद प्रक्रियासमेत अन्योलमा परेको भन्दै छानविनलाई निष्कर्षमा पु¥याउन निर्देशन दिएको हो ।
समितिले छानविन प्रक्रिया लम्बिँदा छानविनलाई प्रभावित पार्ने काम बढ्ने आशङ्कामा यस्तो निर्देशन दिएको हो ।
यसअघि गएको मङ्सिर २८ गते समितिले छानविन कार्यमा प्रभावित पार्न खोजेको भन्दै प्रधानमन्त्री माधवकुमार नेपालसँग पनि स्पष्टीकरण लिएको थियो ।
समितिको आजको बैठकमा छलफलका लागि उपस्थित अख्तियारका सचिव भगवतीकुमार काफ्लेले बैना रकम र छानविनका सम्बन्धमा अख्तियारले चाँडै नै छानविन प्रतिवेदन सार्वजनिक गर्ने बताए ।
निगमले युरोपेली कम्पनी एयरबससँग वाइडबडी विमान खरिदका लागि गतवर्ष नै रु पाँच करोड ७३ लाख बैना रकम पठाएको थियो ।
खरिद प्रक्रिया अपारदर्शी भएको भन्दै गतवर्ष पुस १४ गते लेखा समितिले खरिद प्रक्रिया रोक्न निर्देशन दिएको थियो ।
0
0
