एक महिनाभित्र सेना समायोजन र पुनःस्थापनाको तालिका निर्माण गर्न विशेष समितिको निर्देशन

काठमाडौँ, १ पुस

माओवादी लडाकूको समायोजन, पुनःस्थापन र रेखदेखका लागि गठित सेना समायोजन विशेष समितिको आज बसेको बैठकले एक महिनाभित्र सेना समायोजन तथा पुनःस्थापना कार्यको तालिका निर्माण गर्न सचिवालयलाई निर्देशन दिएको छ ।

प्रधानमन्त्री माधवकुमार नेपालको अध्यक्षतामा प्रधानमन्त्री एवम् मन्त्रिपरिषद् कार्यालय सिंहदरबारमा बैठक बसेको थियो ।

समितिले नेपाली सेनाका पूर्व रथी बालानन्द शर्मालाई सचिवालयको संयोजक नियुक्त गरिसकेको छ ।

अनमिन नेपालबाट फर्कनु अघिसम्म समायोजन र पुनःस्थापनासम्बन्धी कार्यतालिका निर्माण गर्न सचिवालयलाई निर्देशन दिइएको बैठकपछि समितिका सदस्य एवम् एकीकृत नेकपा .(माओवादी) नेता वर्षमान पुनले जानकारी दिए ।

उनले सचिवालय संयोजकलाई राजनीतिक अन्तर्वार्ता नदिन बैठकले सचेत गराएको उल्लेख गरे ।