बुटवल, १२ मङ्सिर
नेपाली काँग्रेसका केन्द्र्रीय सदस्य शेखर कोइरालाले एमाओवादी र एमालेले प्रधानमन्त्री निर्वाचनमा आफूलाई तटस्थ उभ्याएर लोकतन्त्रकै उपहास गरेको आरोप लगाएका छन् ।
प्रधानमन्त्री निर्वाचन र बजेट पारित गर्न प्रधानमन्त्रीले छिटो संसद् अधिवेशन बोलाउनुपर्ने माग गर्दै उहाँले सरकारको पक्षमा स्पष्ट बहुमत भएकाले बजेट पारितका विषयमा विपक्षीसँग सहमति आवश्यक नरहेको समेत बताए ।
नेपाल प्रेस युनियन रुपन्देहीले आज यहाँ आयोजना गरेको पत्रकार भेटघाटमा बोल्दै नेता कोइरालाले लडाकू र हतियारबाट अलग नभएसम्म एमाओवादीको नेतृत्व स्वीकार गर्न नसकिने आफ्नो पार्टीको अडान रहेको वताए ।
शान्ति, संविधान र सत्ता साझेदारीलाई प्याकेजमै सहमति गर्नुपर्नेमा उनको जोड थियो ।
माओवादी लडाकूको समायोजनका सम्बन्धमा नेता कोइरालाले गिरिजाबाबुसँग अन्तिम समयमा बढीमा पाँच हजार लडाकू समायोजन गर्ने सहमति भएको उनले उल्लेख गरे ।
पुष्पकमल दाहाल प्रधानमन्त्रीका रुपमा भारत भ्रमणमा जाँदा भारतीय प्रधानमन्त्रीसँग समेत पाँच हजार लडाकू समायोजन गर्ने भनेको खुलासा गर्दै उहाँले एमाओवादी अध्यक्ष दाहालले बारम्बार कुरा फेरेर समस्यालाई यथावत् राखेको बताए ।
“सुरक्षा निकायका सबै अङ्गमा गरी पाँच हजार लडाकूलाई समायोजन गर्न गिरिजाबाबु सहमत हुनुभएको हो, सेनामा मात्रै होइन”–उनले भने । समायोजन हुनका लागि प्रचलित मापदण्ड पूरा गर्नुपर्ने पनि नेता कोइरालाले स्पष्ट पारे ।
नेता कोइरालाले माओवादीले भन्ने गरेको राष्ट्रपतीय शासन र जातीय आधारमा गरिने सङ्घीयता काँग्रेसलाई अस्वीकार हुने स्पष्ट पारे ।
शान्ति प्रक्रियामा सहमति नभएसम्म काँग्रेसले प्रधानमन्त्रीको उम्मेदवारी फिर्ता नलिने बताउँदै उहाँले भन्नुभयो– ‘बरु ५० पटक चुनाव लड्न काँग्रेस तयार छ ।’
नेता कोइरालाले उम्मेदवारी फिर्ता लिए त्यो लोकतन्त्र विपरित हुने जिकिर गर्दै संसद्मा एमाओवादी र एमालेले आफ्नो पार्टीका प्रधानमन्त्रीका एकमात्र प्रत्यासी रामचन्द्र पौडेलको विरुद्ध बहुमत पु¥याएर देखाएमात्र काँग्रेसले प्रधानमन्त्रीको उम्मेदवारी फिर्ता लिने बताए ।
“एकतर्फी उम्मेदवारी फिर्ता लिने भए शान्ति प्रक्रियामा सहमति जनाउनुपर्छ, नभए अन्य दलले विपक्षमा बहुमत पु¥याउनुपर्छ”–उम्मेदवारी फिर्ता लिन अन्य दलले गरेको आग्रहप्रति कोइरालाले भने । रासस