काठमाडौँ, २१ कात्तिक । नव वर्ष नेपाल संवत् ११३१ आज देशका विभिन्न स्थानमा विविध कार्यक्रम सहित मनाइँदैछ ।
राष्ट्रिय विभूति शङ्खधर साख्वाःले ई.सं. ८८० मा गरिब जनताको ऋण मोचन गरी त्यसको स्मरणमा नेपाल संवत्को प्रारम्भ गर्नुभएको हो ।
गरिब देशवासीको कल्याणका लागि जनस्तरबाट ऋण मोचन गरी संवत् चलाउनुलाई नेपालका इतिहासकारहरुले गौरवपूर्ण घटनाका रुपमा लिएका छन् ।
नेपाल संवत् ८८८ वर्षसम्म आधिकारिक संवत्का रूपमा प्रचलनमा रहेकोमा वि.सं. १९६० मा राज्यस्तरबाटै यसमाथि रोक लगाइएको थियो ।
नेपालमा वि.सं. २००७ मा प्रजातन्त्रको उदय भएदेखि नै नेपाल संवत्लाई पुनःस्थापित गराउन विभिन्न प्रयास हुँदै आएकोमा २०३६ सालबाट राजधानीवासीले सार्वजनिक रुपमा समारोह गरी मनाउन थालेका हुन् ।
नेपाल संवत् प्रारम्भ गरेर समाज तथा राष्ट्रलाई युगान्तकारी योगदान दिएको कदरस्वरूप शङ्खधर साख्वाःलाई सरकारले वि.सं.२०५५ मा राष्ट्रिय विभूति घोषित गरेको थियो ।
वि.सं. २०६४ सालमा तत्कालीन प्रधानमन्त्री पुष्पकमल दाहालको कार्यकालमा नेपाल संवत्लाई राष्ट्रिय संवतको मान्यता दिइएको मानव अधिकारकर्मी मल्ल के सुन्दर बताउँछन् ।
रासस
0
0
