महेन्द्रनगर, १० कात्तिक
केही सातायतादेखि कञ्चनपुर जिल्लामा डेङ्गुबाट सङ्क्रमित व्यक्ति भेटिन थालेको जनस्वास्थ्य कार्यालय कञ्चनपुरले जनाएको छ ।
ती बिरामीमध्ये कञ्चनपुरको कालिका गाविस–४ निवासी डिकादेवी पौडेलको सेती अञ्चल अस्पताल धनगढीमा उपचार भइरहेको छ ।
डेङ्गु सङ्क्रमित हुने बिरामीमा भीमदत्त नगरपालिका–१८ कटानका दम्पत्ति भवानी चन्द, ममता चन्द र अर्का एक नाम खुल्न बाँकी रहेका व्यक्ति रहेको जनस्वास्थ्य कार्यालय कञ्चनपुरले जनाएको छ ।
बिरामीहरुको सेती अञ्चल अस्पताल धनगढीमा रगत परीक्षण गरिएपछि डेङ्गुको सङ्क्रमण भेटिएको जनस्वास्थ्य कार्यालयले जनाएको छ ।
बिरामीहरुमध्ये एकलाई उपचारका लागि काठमाडौँ पठाइएको र दुईजना आफूखुसी अन्यत्र गएको थाहा भएको छ ।
सो विषयलाई लिएर जनस्वास्थ्य कार्यालय कञ्चनपुरले आजदेखि नै जिल्लामा सचेतना कार्यक्रम सुरु गरेको छ ।
यसअघि कैलालीमा पनि डेङ्गुको सङ्क्रमण भएका १२ बिरामी फेला परेका थिए । रासस
0
0
