A+ A A-

गीतकार भुमरीको भाषाको अन्तरक्रिया

राज्यसत्ताImage may contain: 10 people, people standing and suit

दार्जिलिङ, अक्टोबर ९ - काठमाडौँमा बसोबास गर्ने प्यूठानका गीतकार भावेश भुमरी र काठमाडौँमै बसोबास गर्ने दार्जिलिङकी गायिका निखिता थापाको गीति एल्बम भाषाको अन्तरक्रिया कार्यक्रम दार्जिलिङस्थित गोरखा दुख निवारक सम्मेलनको पुस्तकालय हलमा सम्पन्न भएको छ ।

दशैँ तिहारको अवसरमा दार्जिलिङ आएका गीतकार भुमरीलाई यहाँको सप्तरङ्गी सिर्जनशील समूहले कार्यक्रम आयोजना गरी मञ्चमा ल्याएको हो । गोरखाल्यान्ड अन्दोलनमा सहादत प्राप्त गरेका ज्ञातअज्ञात सहिदहरुप्रति एक मिनेट मौनधारण गरी सुरु भएको अन्तरक्रिया कार्यक्रममा गीतकार भुमरी बोल्न मन्चमा उक्लिए र आफ्ना विचार राख्दै भने भौगोलिक सीमाले हामी फरक भए पनि भावना र संवेदनाले सँगै छौँ । दार्जिलिङमा सिरेटो चल्दा हामी नेपालकालाई जाडो हुन्छ । नेपालमा भुइँचालो जाँदा दार्जिलिङलाई दुख्छ । मेचीको सिमाले गीतसङ्गीत, साहित्य र संवेदनालाई छुट्याउन नसक्ने कुरा राख्दै भुमरीले एल्बमका सातैवटा गीतका बारेमा सार रुपमा जानकारी गराउँदै गीतहरु श्रवण गराए ।
Image may contain: 24 people, people smiling, people standing

दार्जिलिङका पुराना पुस्तादेखि नयाँ पुस्तासम्मका कविगीतकार, सङ्गीतकार, गायकगायिका र भुमरीका शुभिचन्तकहरुले खचाखच भरिएको हलका सबै दर्शकले अत्यन्त रुचिका साथ भावेशका भनाइ र गीतहरु सुने । गीतहरु लेख्नुका कारण, गीतका अर्थदेखि रेकर्ड गर्नुसम्मका कुरा अनि भाषाका गीतहरु बज्दा उपस्थित सबैलाई कहिले रोमान्चित बनाए त कहिले भावुक, कहिले अत्यन्त उत्सुक बनाए त कहिले नाजवाफ । भुमरीले गीतसङ्गीतका कुरा राख्दा र एल्बमका गीतहरु बज्दा उपस्थित धेरैका आँखा रसाए । उपस्थित सबैलाई नौलोजस्तो लागेको यस अन्तरक्रिया कार्यक्रममा भुमरी एल्बमका गीत र वर्तमान नेपालको गीतसङ्गीतकै अवस्थाका बारेका केन्द्रित भए । निजी क्षेत्रमा अहोरात्र खट्दै काम गरेर पनि निरन्तर यो क्षेत्रमा लगानी गर्नुका कारण खोल्दै भुमरीले आफ्नो कुनै व्यक्तिगत स्वार्थ नरहेको कुरा राखे ।

वरिष्ठ गीतकार, सङ्गीतकार तथा गायक दुर्गा खरेलले अन्तरक्रिया कार्यक्रममा श्रवण गरिएका गीतहरुको समीक्षा गर्दै भने भावेशका सातवटा गीत इन्द्रेणीका सात रङजस्तै छन् र सबैको अर्थ एउटा सुन्दर इन्द्रेणी हो । भावेशका परिष्कृत एवम् अर्थपूर्ण गीतहरुमा सङ्गीत, सङ्गीत संयोजन र गायन अत्यन्तै सबल छन् र सबै गीत जति सुन्यो त्यति सुनूँ लाग्छन् । काठमाडौँदेखि दार्जिलिङसम्म भौतिक रुपले कार्यक्रम गर्न आइपुगेका भुमरी गीतसङ्गीतमा मेचीका अति विश्वासिला पुल हुन्, जसले हामीलाई युगयुगसम्म जोड्ने छन् । कार्यक्रममा बोल्दै सङ्गीतकार प्रदीप क्षेत्रीले भने अति सरल, मिलनसार, सहयोगी र प्रतिभावान् भावेशका गीतहरुमा सङ्गीत भर्दा आफूलाई छुट्टै अनुभव हुँदै आउनुको कारण गीतहरुका अर्थ र संरचनाको सबलता नै हो । यही कारण आफूले भावेशका धेरै गीतमा सङ्गीत भरेको कुरा क्षेत्रीले राखे । कार्यक्रमको सभापति वरिष्ठ गीतकार अजित बस्नेतले भुमरीको गीतिलेखन र यो क्षेत्रको लगानीको खुलेर प्रशंसा गर्दै भने हाम्रा यहाँका कविगीतकारहरुले पनि यसरी नै भाषा, साहित्य र गीतसङ्गीतको क्षेत्रमा काम गर्ने हो भने हाम्रो कला र साहित्य अत्यन्त धनी हुने छ ।
Image may contain: 7 people, people sitting and indoor

सङ्गीतकार चन्दन लोम्जेल, गायक पेमा लामा, गायिका डेजी बराइली, गीतकार पेम्बा बमजन, सङ्गीतकार सुरज मोक्तान, गायक किरण मोक्तान, सङ्गीतकार जीवनप्रकाश प्रधान, गायिका सोनु राई, गीतकार अजय थापा, मगर संघ भारतका अध्यक्ष दीपक थापालगायत दर्जनौँ स्रष्टाहरको उपस्थिति रहेको यस कार्यक्रमको सन्चालन कवि सुरेन्द्र चाम्लिङले गरेका थिए ।

एल्बम भाषाका सातवटै गीतमा एकल स्वर गायिका निखिता थापाको रहेको छ भने एउटा गीतको सहगायनमा थुप्देन भुटिया र अर्को गीतको सहगायनमा महेश सेवाले साथ दिएका छन् । एल्बममा दिनेश सुब्बा, प्रदीप क्षेत्री, विमला सी प्रधान, पविधन खालिङ, सन्तोष श्रेष्ठ, केशव पौडेल र कर्मग्याल्छेन बमजनका सङ्गीत रहेका छन् भने सचीन सिंह, नोर्बु शेर्पा, चाँद सिंह, पविधन खालिङ र कुमार थापाका सङ्गीत संयोजन रहेका छन् । अनील स्थापितले आवरण तयार पारेको भाषा एल्बमका सबै गीत भुमरीकै ह्वाइट साउन्ड स्टुडियो अनामनगर काठमाडौँमा रेकर्ड भएका हुन् भने भुमरीले आफ्नै म्युजिक कम्पनी सुरप्रभा गीत सङ्गीत प्रालि काठमाडौँबाट बजार व्यवस्थापन गरेका छन् ।

हार्दिक श्रद्धान्जलि - एक बहादुर राना मगर
हार्दिक श्रध्दाञ्जलि - गोरे बहादुर खपांगी